Основни услови за повторно отворање на Вашиот хотел кога ќе заврши пандемијата

од Игор Дамчевски

Денес, услужните дејности, како угостителството, се наоѓаат во сериозни тешкотии. Луѓето, стравувајќи од можна зараза, претерано се изолираат и социјално се дистанцираат. Дополнително, неодамна наметнатите протоколи за работа на хотелско-угостителските објекти не им дозволуваат на хотелите нормално и навремено да отпочнат со работа. Главен проблем во моментов е тоа што и покрај ригорозните мерки, за кои хотелиерите негодуваат, сеуште е нејасно како во пракса ќе одржува хигиената и на кој начин безбедно ќе се оствари интеракцијата со гостите.

Како и да е, овие новонастанати предизвици ќе бидат со нас усште извесно време и секој хотел треба да биде подготвен да се прави со широк спектар на потенцијални вируси, вклучувајќи го или почнувајќи со Коронавирусот. Во спротивно, тие нема да се отворат повторно. Самата динамиката и природа на работење на хотелските објекти може многу брзо да ги претвори во локално жариште доклку не се следат доследно правилата и препораките.

Очекувањата се променети

За среќа, оваа пандемија, како и сите останати пред неа, ќе помине. Во интерес на хотелите е што порано да отворат и да започнат со работа. Не само што упатствата на Светската здравствена организација за сместувачките капацитети како резултат на пандемијата диктираат нови услови, туку и очекувањата на гостите за хигиена, чистота и безбедност се значително различни од порано.

Следејќи ги промените кон горенаведените очекувања, Booking.com поставува минимален праг на чистота за да ги спроведе стандардите за квалитет и безбедност. Според нив, секој хотел треба да направи проценка на процедурите за чистење за да ги задоволи минималните барања за квалитет. Доклку хотелот не ги исполнува зададените услови, истиот може да биде избришан.

Значи, како што гледаме, неочекуваното појавување на Covid19 е еден од најтешките предизвици со кои денес се соочуваат со угостителството и туризмот. Последиците од карантинските мерки се катастрофални за туристичката индустрија. Нашиот сектор доживува огромни финансиски загуби низ целиот свет.

Освен тоа, хотелиерите се загрижени дали ќе бидат во можност да ја гарантираат безбедноста за своите клиенти и вработени. Зборувајќи за второто, вработените се сеуште во неизвесност, затоа што нивната работа не може да се работи од дома, се разбира. Некои хотели се претворија во карантин-центри за привремена изолација. И нивниот главен приоритет сега е да најдат ефикасен начин како да ги заштитат своите гости и вработени, но и нормално да продолжат со работа.

Како одговор на горенаведеното, следат неколку релевантни и практични упатства и општи препораки, изведени од Прирачникот за превенција и справување со кризни ситуации поврзани со Covid-19 кај хотелите и другите туристички сместувачки капацитети. (истиот можете да го преземете ТУКА) Препораките се во согласност со Европскиот центар за превенција и контрола на болести и имаат за цел да им помогнат на хотелиерите да ги исполнат новите барања и да се подготват за враќање на гостите.

10 важни безбедносни препораки

  1. Едуцирајте го вашиот персонал за тоа како да ги исчистите и дезинфицирате честопати допираните површини. Потсетете ги за носење ракавици за еднократна употреба и заштитни маски. Посочете им кои средства за чистење треба да ги користат и како правилно да го сторат тоа. Тоа може да бидат, на пример, разредени раствори од белило или алкохолни раствори со најмалку 70% алкохол.
  2. Објаснете му на вашиот персонал како правилно да пере. Користите врела вода. Вработените мора да носат ракавици за еднократна употреба секогаш кога ракуваат со валкани алишта.
  3. Проверете ги филтрите за климатизација и функционалноста на опремата за вентилација. Научете го вашиот персонал правилно да ја вентилира просторијата по гостите кои ги напуштаат собите.
  4. Инсистирајте на важноста на миење раце – често, со сапун и топла вода најмалку 20-30 секунди. Поставете информтивни флаери и инфографик за хигиена на рацете во заедничките простории. Обезбедете доволна количина и достапност до растворите за дезинфекција, рачен сапун и алкохол.
  5. Инсистирајте на важноста и обврската за следење на респираторната етикеција. Тоа значи дека клиентите и персоналот мора да киваат или кашлаат во хартиено марамче или само доколку тоа не е можно – во лактот.
  6. Воведете соодветни мерки за да се обезбеди физичко растојание (од 1,5 до 2 м.) во областите, каде што клиентите и вработените имаат тенденција да се задржуваат подолг временски период. На пример, утврдете го максималниот број на дозволени лица во ресторанот или лобито.
  7. Ако одржувањето на социјално растојание не може правилно да се контролира, поставете пластични панели со пораки за растојание испечатени на нив. Хотелиерите исто така треба да истистираат на спроведување на мерките за дезинфекција и физичко растојание и во надворешните простори. Сите настани и концерти треба да бидат одложени на неодредено време!
  8. Посочете му на вашиот персонал дека е потребно за внимава и слуша дали гостинот кашла, пред да влезе во неговата соба. Ако вратата е веќе отворена, врабтените треба да забележат дали во собата има искористени марамчиња, лекови за настинка и сл. Ако се сомневаат дека некое лице е болно, тие мора веднаш да заминат и да ја известат управата. Менаџерот е должен да понуди и  повика медицинска помош.
  9. Доколку постои сомнителен случај на вработен или гостин со симптоми на Коронавирус, ова лице мора да се изолира според протоколите.
  10. Во случај на гостин кај кого е потврдена инфекција, персоналот за чистење мора да ја исчисти просторијата користејќи ја комплетната задолжителна заштитна опрема, според процедурите опишани во прирачникот и зададените протоколи.

Се работи за доверба

Хотелите минуваат низ еден од најтешките периоди во нивната историја, и тоа е на глобално ниво. Сепак, оваа ситуација ќе помине и најважната работа во ова време е да се биде хуман. Бидете одговорни и почитувајте ги и гостите и персоналот кој го ризикува своето здравје, секој ден на своето работно место.

Целата оваа ситуација ќе заврши, но односите ќе траат. Хотелиерите треба да сторат сé што можат за да ја задржат довербата, како кај гостите така и кај своите вработени. Спроведувањето на процедурите и обуките на персоналот ќе ви помогне да го одржите редот и безбедноста во хотелот. Соодветен план за справување со кризни ситуации ќе Ви помогне да ги намалите шансите Вашиот хотел да се најде во медиумите. И сето тоа заедно, дефинитивно ќе ја зајакне репутацијата на вашиот хотел во иднина.

Прирачник за хотели во пресрет на најавеното олеснување на мерките против Коронавирусот

Во соработка со Regent Hospitality Consulting
Информирајте се како правилно да го припремите вашиот објект за ефикасно справување со COVID-19
ПРЕЗЕМИ ГО ПРИРАЧНИКОТ
* Според препораките на Светската Здравствена Организација
close-link